ಇತರ ಕ್ಷೇತ್ರಗಳು

ನಾವು ಸಹವರ್ತಿಗಳೊಂದಿಗೆ ಹಲವು ಕ್ಷೇತ್ರಗಳಲ್ಲಿ ಕೆಲಸ ಮಾಡುತ್ತೇವೆ – ಈ ಕೆಲವು ಕ್ಷೇತ್ರಗಳ ವಿವರಗಳನ್ನು ಅನುದಾನಗಳು ವಿಭಾಗದಲ್ಲಿ ನೋಡಬಹುದು. ನಮ್ಮ ಉಪಕ್ರಮಗಳು ಬೆಂಗಳೂರಿನಲ್ಲಿ ವಸತಿರಹಿತರಿಗೆ ಆಶ್ರಯ ನೀಡುವುದರಿಂದ ಹಿಡಿದು, ಆಂಧ್ರಪ್ರದೇಶ ಮತ್ತು ಜಾರ್ಖಂಡ್‌ನ ಆದಿವಾಸಿ ಸಮುದಾಯಗಳಿಗೆ ಅತ್ಯಗತ್ಯ ಸೇವೆಗಳು ತಲುಪುವಂತೆ ಮಾಡುವುದರವರೆಗೂ ವಿಸ್ತರಿಸಿವೆ. ಜೊತೆಗೆ, ಸಾಮರ್ಥ್ಯ ಅಭಿವೃದ್ಧಿ, ಬೆಂಬಲ ಜಾಲಗಳ (advocacy networks) ಸೃಷ್ಟಿ ಮತ್ತು ಸರ್ಕಾರದ ಯೋಜನೆಗಳಿಗೆ ನೆರವಾಗುವ ಮೂಲಕ ಭಾರತದಲ್ಲಿ ನಾಗರಿಕ ಸಮಾಜ ಹಾಗೂ ಅದರ ಸಂಸ್ಥೆಗಳನ್ನು ಸಬಲಗೊಳಿಸಲು ನಾವು ಕೆಲಸ ಮಾಡುತ್ತೇವೆ.

ನಮ್ಮ ಕೆಲಸದ ಇನ್ನು ಕೆಲವು ನಿರ್ದಿಷ್ಟ ಮತ್ತು ಪ್ರಮುಖ ಕ್ಷೇತ್ರಗಳು:

• ಕರ್ನಾಟಕ ರಾಜ್ಯದ ಸರ್ಕಾರಿ ಶಾಲೆಗಳಲ್ಲಿ ಓದುತ್ತಿರುವ 45 ಲಕ್ಷಕ್ಕೂ ಹೆಚ್ಚು ಮಕ್ಕಳಿಗೆ ಮಧ್ಯಾಹ್ನದ ಬಿಸಿಯೂಟದ ಜೊತೆಗೆ ವಾರಕ್ಕೆ 4 ದಿನ ಒಂದು ಮೊಟ್ಟೆ (ಅಥವಾ ಬಾಳೆಹಣ್ಣು) ನೀಡಲು ನೆರವು ನೀಡುತ್ತಿದ್ದೇವೆ. ಈ ಯೋಜನೆಗೆ, ನಾವು 3 ವರ್ಷಗಳಲ್ಲಿ ಸುಮಾರು ₹1,500 ಕೋಟಿ ಅನುದಾನ ನೀಡಲು ಬದ್ಧರಾಗಿದ್ದೇವೆ.
• ಯುವಜನರು ತಮ್ಮ ಸಾಮಾಜಿಕ ಬದ್ಧತೆಯನ್ನು ಬೆಳೆಸಿಕೊಳ್ಳಲು ಮತ್ತು ಸಂವಿಧಾನಿಕ ಮೌಲ್ಯಗಳನ್ನು ಆಚರಣೆಗೆ ತರಲು ನಾವು ಅವರೊಂದಿಗೆ ಕೆಲಸ ಮಾಡುತ್ತೇವೆ. ಪ್ರಸ್ತುತ, ಈ ಕಾರ್ಯಕ್ರಮಗಳಲ್ಲಿ 4.5 ಲಕ್ಷಕ್ಕೂ ಹೆಚ್ಚು ಯುವಜನರು ನಮ್ಮೊಂದಿಗೆ ಮತ್ತು ನಮ್ಮ ಸಹವರ್ತಿಗಳೊಂದಿಗೆ ತೊಡಗಿಸಿಕೊಂಡಿದ್ದಾರೆ.
• ಜಾಗರೂಕತೆಯಿಂದ ಬಳಸಿದಾಗ ತಂತ್ರಜ್ಞಾನವು ಸಾಮಾಜಿಕ ಕ್ಷೇತ್ರದಲ್ಲಿ ಉಪಯುಕ್ತವಾಗಬಹುದು. ಸಾಮಾಜಿಕ ಕ್ಷೇತ್ರದಲ್ಲಿ, ತಂತ್ರಜ್ಞಾನದ ಬಳಕೆ ಮತ್ತು ಅಳವಡಿಕೆಗಾಗಿ ಮಾನವ ಸಾಮರ್ಥ್ಯದ ಅಭಿವೃದ್ಧಿಗೆ ನಾವು ನೆರವು ನೀಡುತ್ತೇವೆ. ಹಾಗೆಯೇ, ನಾಗರಿಕ ಸಮಾಜ ಸಂಸ್ಥೆಗಳ ನಿರ್ದಿಷ್ಟ ಅಗತ್ಯಗಳು ಮತ್ತು ಸಂದರ್ಭಗಳಿಗೆ ತಕ್ಕಂತೆ ‘ಆ್ಯಪ್’ಗಳ ಅಭಿವೃದ್ಧಿಗೂ ನೆರವಾಗುತ್ತೇವೆ.
• ಕಲೆ ಮತ್ತು ಸಂಸ್ಕೃತಿ ಕ್ಷೇತ್ರದಲ್ಲಿನ ನಮ್ಮ ಕೆಲಸವು ಭಾರತದ ಜನರಿಗೆ ಫೌಂಡೇಷನ್‌ನ ಉದ್ದೇಶವನ್ನು ಕಥನಗಳ ಮೂಲಕ ತಲುಪಿಸುತ್ತದೆ. ಈ ಕಥನಗಳನ್ನು ರೇಡಿಯೋ ಮತ್ತು ಪಾಡ್‌ಕಾಸ್ಟ್‌ಗಳು, ಕಲೆ, ಸಂಗೀತ ಮತ್ತು ಚಲನಚಿತ್ರಗಳಂತಹ ವಿವಿಧ ಮಾಧ್ಯಮಗಳು ಹಾಗೂ ರೂಪಗಳ ಮೂಲಕ ತಲುಪಿಸಲಾಗುತ್ತದೆ.